كبداية

فكرت كتير قبل ما اكتب انا عاوزة اكتب في ايه .

يا تري في الفساد؟ طب ما هو ما فيش حد ما كتبش في الفساد بدايه من عمنا احمد رجب في نص كلمه و نهايه بكل واحد قعد قدام جهازة عشان يكتب و يقول راية في اللي بيحصل - و ربنا يستر عليه - فقلت لنفسي يعني هما اللي كتبوا عملوا ايه؟

كل يوم بيكتبوا و كل يوم الفساد بيزيد

و انا هنا ما بتكلمش عن الفساد السياسي و توريث الحكم- ولا كأنها مملكة ابوهم- و بس لا انا بتكلم عن الفساد بشكل عام

الفساد الاخلاقي ,و موضوع التحرشات الجنسيه اللي حصل في وسط البلد و اللي ما بيفارقش خيال اي بنت او اي اهل ولادهم في الشارع

و اي ونوع من الفساد انت ممكن تقابلة زي الموظف اللي بيفتحلك الدرج و يطالبك برشوة- علي فكرة موضوع فتح الدرج ده اختفي لان بقي في تسعيرة محددوده لكل حاجه ما بقتش سايبة و كل واحد يدفع اللي علي مزاجه, انتوا هاتهرجوا- اهو كله فساد و مش فارقه كتير

طب قلت اكتب عن الفن

لقيته بردو فساد ,ناس قالعه هدومها و رجاله بتهز وسطها و لا اجدع رقاصه في شارع محمد علي- اللي اتلغي برده- اصل ما فيش داعي ان يبقي في شارع خاص بالرقاصات و الرقاصات ما شاء الله ماليين البلد ما هم خلوا البلد كلها شارع محمد علي

احترت جدا اكتب في ايه في الرقاصين اللي بيمثلوا ولا الممثلين اللي بيرقصوا و البيضه الاول ولا الفرخه

فقلت اكتب رأي - مجرد رأي- اعبر بيه عن اللي جوايا و جوانا يمكن في يوم من الايام الاقي حاجه اتغيرت ما احنا طول عمرنا بنسمع عن قوة الكلمة اللي قادرة انها تحرك الجبال -بس بيني و بينكوا احنا ما عندناش حد بيسمع اصلا

قلت لنفسي; و حتي لو ما فيش حاجه اتغيرت اهو اديني خرجت الكبت اللي جوايا و اللي ممكن يولد الانفجار او بعيد عنا و عن السامعين (الثورة) , حتي لو كانت ثورة بسيطه زي ثورة العقل