نزولا علي رغبات الجماهير

اولا هاي يا جماعه عاملين ايه

ثانيا البوست ده انا مش هاكتب فيه اي حاجه

هو هيكون مجرد لينكين

اللينكين اتطلبوا بشكل مباشر او غير مباشر في الردود بتاعت البوست اللي فات

اللينك الاول هو لينك فيلم تايتانك

اللي عملي التخلف العقلي اللي اتكلمت عنه في البوست اللي فات

ده التورنت بتاع الفيلم بالترجمة اللي ماشيه معاة

اللينك التاني هو لينك اغنيه فيروز اللي انا حاطاها في البلوج

ليلة عيد

اعتبروا اللينكين دول هديه السنه الجديده و خصوصا اني حاولت اكتر من مرة اني اكتب لكن ما عرفتش

مش لاقيه كلام اكتبه

حتي بوست سيلين ديون حاولت اكتر من مرة اني اكتبة لكن مش عارفه ليه مش قادرة اجمع افكاري

عموما سامحوني علي موضوع بوست سيلين ديون

و كل سنه و كلكوا طيبين

و يا رب السنه الجديدة تكون خير علينا كلنا

مش عارفه

هاي يا جماعه انا اسفه اني اتأخرت اوي كده في الكتابه بس ده كان بسبب ظروف ضغط الشغل و حاجات تانيه كتير

مسيري هاكلمكوا عنها في يوم من الايام

انا كنت ناويه ان بوست النهارده يكون عن سيلين ديون بس حصلت حاجه خلتني اقرر اني ااجل بوست سبلين ديون شوية و انتو هاتشوفوا ان كان معايا حق

********************

من حوالي شهر نزل علي النت نسخه جديدة من فيلم تايتانيك و نظرا لحبي للفيلم ده قررت اني احمله و اهو يفضل عندي و مسيري هاتفرج عليه و خصوصا اني ما شفتوش غير مرة واحده ايام م كان لسه نازل في السنيما في مصر و كان ايامها عامل ضجه رهيبة

رجعت امبارح من الشغل بدري و لقيت ماما لسه ما عملتش الاكل قلت يا بت ادخلي بصي علي الكومبيوتر شوفي ايه احواله و خصوصا

اني ما اعرفش عنه حاجه من حوالي اسبوعين!! قعدت اقلب في الجهاز لقيت فيلم تايتانيك

قلت اتفرج عليه شغلت الفيلم و في وسط ما انا بتفرج حبيت اعرف اسم الممثل اللي كان طالع بدور خطيب كيت وينسلت

دخلت علي موقع

imdb

دورت علي الفيلم و فتحته عشان اكتشف ان الفيلم انتاج سنه

1997

يعني من عشر سنين

ساعتها اصابتني حاجه كدة شبه صدمه

الفيلم كان نازل من عشر سنين

يعني انا ما اتفرجتش عليه من عشر سنين

يا نهار ابيض

انا عمري فيه عشر سنين كاملين ممكن اقول انا ما شفتش فيهم فيلم؟؟؟؟؟

للدرجه دي ؟؟؟

مشكلتي الابديه اني حاسه اني لسه طفله صغيرة

كل ما حد يقولي حاجه اقوله هو انا كلي كام سنه؟!! انا كلي 22 سنه

ساعتها اكتشفت ان انا مش بالطفوله دي و ان انا كبيره و ان 22 سنه دي مش حاجه بسيطه

و ممكن لما اكلم حد اقوله انا ما شقتش تايتانيك من عــــــــــــــــشـــــــــــــــــــر سنيييييين

كنت بحس ان الكلام ده بتاع ماما و خالتي و الناس الكبار دول

هما بس اللي ممكن يتكلموا بالعشره و العشرين سنه

لكن اكتشفت ان انا كمان دخلت الدايرة دي و ان في فعمري كذا عشر سنين

الفكرة ان العشر سنين دول عدوا و انا ما خدتش بالي منهم

ما حسيتش بيهم

و ادي 2007 بتخلص و داخله 2008

و بردو ما عملتش حاجه و مش واخدة بالي ان مرحله الطفوله عدت و ان انا المفروض اكون في مرحله مختلفه

كنت من فترة فكرت اكتب

diaries

لكن اكتشفت ان بيفوت وقت كبير جداااااااا بين كل كتابه و التانيه

افتح الاقي فجاة ان فات شهر من غير ما اكتب حاجة و من غير ما اخد بالي

و بدات افكر اني في يوم هافتح الكشكول هلاقي عمري كله فات و انا مش واخده بالي

هافتح هلاقي الكشكول بيقولي

عفوا لقد نفذ عمركم يرجي عدم امحاوله فيما بعد

حاله غريبه من الاحباط او من التشتت

عاوزة اعمل حاجه لكن مش عارفه هي ايه الحاجه اللي المفروض اعملها

انا دلوقتي عندي 22 سنه و ما عملتش اي انجاز في حياتي

طب ايه الانجاز اللي المفروض اعمله

عاوزة اقعد و افكر بس للاسف دوامه الشغل و الكورسات و البيت مش مدياني ااقل فرصه اني اقعد مع نفسي و افكر

مشتته مشتته مشتته

و مش عارفه انا عاوزه ايه و لا المفروض اعمل ايه

ها مش كان ليا حق اني أأجل بوست سيلين ديون ؟؟؟؟؟؟

فيروز

مش عارفه ليه بحس بشبه غريب بين المطربه الكنديه(علي ما اظن)سيلين ديون والمطربه فيروز
دايما لما بتكلم مع صحابي عن سيلين ديون اقول عليها دي فيروز الغرب
نفس الصوت الهادي الرقيق و الاحساس العالي و القدرة علي خلق حاله خاصه تعيش الواحد فيها
انا هتكلم الاول عن فيروز و ممكن اتكلم عن سيلين مرة تانيه
مش عارفه ليه صوت فيروز مرتبط معايا بالشتا و البرد
يعني لما الجو يكون برد و السما علي وشك انها تمطر
و الدنيا مغيمة اوي
الشوارع شبه فاضيه
الناس الموجوده في الشارع بتجري عشان تلحق تروح بيوتها قبل ما تمطر عليهم
و الشمسيات
و الجواكت التقيله المضمومة اتقاءً للبرد
ساعتها بحس ان فيروز هي ملكه اللحظه
ساعتها صوت فيروز بقدر ياخدك لعالم تاني خالص عالم فيه
طرقات مهجورة
و ورق شجر لونه اصفر واقع علي الارض
وفيه البنات ما بيتقالش عليهم بنات و بيتقال عليهم صبايا
و الحب اسمه هويَ
و الناس ما بتزعلش الناس فيه بتنقهر
عالم زجاجي رائع
حاجه كده كأني مسكت
snow globe
لو حد يعرفها و بصيت فيها شفت كل ده
اللي سمع اغنيه ضحك اللوز او اغنيه رجعت الشتويه هايفهم انا بتكلم عن ايه
ياااااااااااااااة ... ايه العبقريه دي
الوحيده اللي مع صوتها تقدر تسمع صوت افكارك - تسمع افكارك بوضوح- ما فيش موسيقي عاليه تغلوش عليك
او صوت نشاز او ممرقع - سوري علي ممرقع دي بس ده الوصف الوحيد اللي ممكن تتوصف بيه الاصوات دي- يشتت ذهنك
فيروز دي عبارة عن معادله صعبة خلقتها موهبه الهيه مع غبقريه الحان الرحبانيه مع اشعار حساسه و رقيقه جدا
عملت حاله حاله من العذوبه و الرُقي
حاله صعب انها تتكرر تاني

حاجة تفرح

هاي يا جماعة

وحشتوني جداااااااااااو وحشتني الكتابه

اسفه عن تأخري في الرد علي تعليقاتكم علي البوست اللي فات

لكن ده كان لظروف ممكن نقول عليها قهريه(اذا ما كان التغيير من شركه

link

ظروف قهريه) و طبعا الفترة اللي كان النت فاصل فيها كانت عباره عن شعور غريب باني مقطوعه عن العالم

و طبعا حاولت ارجع للطرق للبدائيه تاني و ادخل بخط التليفون و ساعتها اكتشفت الطامه الكبري الا و هي ان الصفحه بتاعتي اد ايه تقيله لدرجه اني قعدت حوالي ربع ساعه في انتظارتحميل الصفحه الكريمه و طبعا ده كله بلا جدوي او زي ما بيقول الامريكان

in vain

و الحمد لله رجع النت و دخلت ابص علي البلوج بتاعي و اشوف ايه اخبار البوست اللي فات و يا تري عجب الناس ولا لا

و الحمد لله اكتشفت انه عجب الناس و في وسط التعليقات اللي كانت موجوده علي البوست اللي فات لقيت

oceaneyes

كاتبه بتسأل عليا و بتطمن علي سبب غيابي

مش قادرة اوصفلكم اد ايه سؤالها ده بسطني

و ساعتها اكتشفت ان البلوج ده مش مجرد مساحه للتعبير عن الرأي او الكتابه الحرة ة بس

دة كمان مكان لتواصل الناس حتي لو ما كانوش يعرفوا بعض كويس

يكفي انهم شافوا جزء من افكار بعض و ده خلاهم يتواصلوا و ممكن يكونوا صداقات

طبعا انا كده طولت عليكم جدا بس اعمل ايه انتو عارفيين التأثر بقي بيعمل ايه في الناس

عموما كفايه عليكوا تأثر لحد كده

حكايه حب

دي ممكن تكون اسطورة و ممكن تكون حدوته

و انا شايفاها حكايه

حكايه انا بحبها

و يا رب انتو كمان تحبوها زيي

********************

حكاية حب

يحكى في قديم الزمان

حيث لم يكن على الأرض يشر بعد..

كانت الفضائل والرذائل.. تطوف العالم معا

..وتشعر بالملل الشديد

....ذات يوم... وكحل لمشكلة الملل المستعصية...

اقترح الأبداع.. لعبة.. وأسماها الأستغماية.. أو الطميمة.

.أحب الجميع الفكرة...

وصرخ الجنون: أريد أن أبدأ.. أريد أن أبدأ...أنا من سيغمض عينيه.. ويبدأ العدّ

... وأنتم عليكم مباشرة الأختفاء..

..ثم أنه اتكأ بمرفقيه..على شجرة.. وبدأ"...واحد... اثنين.... ثلاثة...."

وبدأت الفضائل والرذائل بالأختباء

..وجدت الرقة مكانا لنفسها فوق القمر..

وأخفت الخيانة نفسها في مستنقع من القاذورات

...و دلف الولع... بين الغيوم..

ومضى الشوق الى باطن الأرض

...بينما قال الكذب بصوت عال: سأخفي نفسي تحت الحجارة

.. ثم توجه لقاع البحيرة

..واستمر الجنون: تسعة وسبعون... ثمانون.... واحد وثمانون

..خلال ذلك أتمت كل الفضائل والرذائل تخفيها

... ماعدا الحب...كعادته.. لم يكن صاحب قرار

... وبالتالي لم يقرر أين يختفي..وهذا غير مفاجيء لأحد...فالكل يعلم صعوبة إخفاء الحب..

تابع الجنون: خمسة وتسعون....... سبعة وتسعون

....وعندما وصل الجنون في تعداده الى: مائة

..قفز الحب وسط مجموعة من الورد.. واختفى بداخلها..

فتح الجنون عينيه

.. وبدأ البحث صائحا: "أنا آت اليكم.... أنا آت.."

كان الكسل أول من أنكشف...لأنه لم يبذل أي جهد في إخفاء نفسه

ثم ظهرت الرقّة المختفية في القمر...

وبعدها.. خرج الكذب من قاع البحيرة مقطوع النفس...

واشار على الشوق ان يرجع من باطن الأرض

...وجدهم الجنون جميعا".. واحدا بعد الآخر....ماعدا الحب

..كاد ان يصاب بالأحباط واليأس.. في بحثه عن الحب...

حين اقترب منه الحسد..وهمس في أذنه: " الحب مختف ٍ بين شجيرات الورد.."

التقط الجنون شوكة خشبية أشبه بالرمح.. وبدأ في طعن شجيرة الورد بشكل طائش

..ولم يتوقف الا عندما سمع صوت بكاء يمزق القلوب

...ظهر الحب.. وهو يحجب عينيه بيديه.. والدم يقطر من بين أصابعه و قد فقد عينيه

...صاح الجنون نادما": يا الهي ماذا فعلت؟ماذا أفعل كي أصلح غلطتي بعد أن أفقدتك البصر ؟..

"أجابه الحب: لن تستطيع إعادة النظر لي... لكن لازال هناك ماتستطيع فعله لأجلي

..كن دليلي ..قدني في هذة الحياة..

.وهذا ماحدث منذ ذاك الحين....

مضي الحب الأعمى

... يقوده الجنون..

نزار

ما قدرتش يكون عندي مدونه و الناس بتقراها و ما احطش فيها حاجه من شعر نزار

و ده كأقل تعبير عن مدي اعجابي بنزار كشاعر

(برغم بعض التحفظات علي بعض القصائد)

يظل نزار هو اروع من كتب عن الحب فأسمحولي بين كل فترة و التانيه احط قصيده او جزء من احد قصائد نزار

ممكن تكون بتعبر عن الموود اللي انا فيه

او الحاله اللي انا عايشاها

***************************

أأقول احبك يا قمري

عيناكِ كنهري أحـزانِ

نهري موسيقى.. حملاني

لوراءِ، وراءِ الأزمـانِ

نهرَي موسيقى قد ضاعا

سيّدتي.. ثمَّ أضاعـاني

الدمعُ الأسودُ فوقهما

يتساقطُ أنغامَ بيـانِ

عيناكِ وتبغي وكحولي

والقدحُ العاشرُ أعماني

وأنا في المقعدِ محتـرقٌ

نيراني تأكـلُ نيـراني

أأقول أحبّكِ يا قمري؟

آهٍ لـو كانَ بإمكـاني

فأنا لا أملكُ في الدنيـا

إلا عينيـكِ وأحـزاني

**********

ده جزء من قصيده انا بحبها موووووت اسمها أأقول أحبك يا قمري

علي فكرة ده جزء صغير منها

يعني مش كلها

كل عام و انتم بخير

كل سنه و كل المدونين بخير و بصحه و سعادة

خلص رمضان و خلص الصيام

و جه وقت الكحك و الهيصة

احلي حاجه في العيد لما الواحد يفضل صاحي يفرش في البيت اللي فضل ينضف فيه طول العشرة الاواخر من رمضان

و بعد كده ياخد الدش الجامد و يفضل قاعد يقاوم في النوم لحد صلاه العيد

و النزول للصلاة

ما بحسش بالعيد بجد الا لما بشوف الناس و هي خارجه من الصلاه

و الجلاليب البيضه

و البلالين

يا رب يكون عيد سعيد عليكوا كلكوا

و كل واحد يحس بيه بطريقته الخاصه

و يفرح بيه بالشكل اللي يعجبه

اشمعنا بقي ؟؟؟؟

سمعت السؤال ده قبل كده و فضل شاغل تفكيري و قررت اني اشغل تفكير قراء المدونه بيه -ده لو كان في حد يعرف مدونتي اصلا او بيقراها- و يمكن حد يديني رد منطقي يريحني....!! ايه بقي السؤال ؟؟؟؟؟؟

السؤال كان

ليه الدوله بتسمح بتجارة الخمور و مانعه تجارة الحشيش؟؟؟؟

او ليه عموما العالم مانع تجارة المخدرات و سامح بتجارة الخمور....!!؟؟

ما كله زفت

ولا ايه ؟؟؟؟

يا ريت لو حد عنده رد ممكن يريحني و يريح اللي سألني السؤال يتصل بينا علي

090037887

و صاحب الاجابه الصح هايكسب معانا في الفقرة دي

امتي هاننضف ؟؟؟

زمان كنت كان في واحد اعرفه - و الله يسهله مطرح ما راح - قال كلمه حكمه (و يمكن هي دي الكلمه العدله الوحيده اللي قالها في حياته) قال ايه بقي ؟؟؟

قال ان الشعب المصري عمرة ما هينضف

و ما تتخيلوش اد ايه بكتشف مدي صحه كلمته دي يوم بعد يوم

احنا و بلا فخر الشعب الوحيد اللي يعتبر عدو النضافه الاول في العالم، و للاسف الموضوع ده مالهوش علاقه بمستوي اجتماعي معين يعني مش مرتبط بطبقه معينه

ده حاجه متأصله فينا

مدفونه جوانا

متغلغلة

متعمقه

(كفاية صفات لحد كده لحسن انا لو بدأت مش هاسكت

اديكو بقي مثال بسيط علي موضوع مالهوش علاقة بغني و لا فقير؛ طبعا كلنا عارف المشهد الفظيع بتاع العربية الشيك الفخمه اللي تلاقي الازاز بتاعها مقفول لسببين: السبب الاول طبعا هو التناكه ، و السبب التاني عشان صاحب العربيه مشغل التكييف

فجأة تلاقي الحاجز اللي بينه (صاحب العربيه) و بين العالم نزل - الحاجز ده اللي هو ازاز العربيه طبعا- و تلاقي صاحب العربيه طلع نصه بره و راح عامل اغرب حركه ممكن انسان يتصورهي في حياته؛ الا و هي انه يروح تافف- ايوة ما حدش قرا غلط يتف- و كأن التحضر أو النضافه أو حتي التفكير اتلغوا من القاموس، و طبعا مش مشكلته انه يعرف مصير التفه دي ايه بقي... جت علي العربيه اللي

جنبه ؛ جت علي سواق الموتوسيكل اللي معدي كل واحد و نصيبه

و طبعا موضوع التف ده مش مقتصر علي اصحاب العربيات- و الا كل اللي هايقرا هايقول اني من اعداء كل من لديه سيارة - ده الموضوع ده كمان علي اللي ماشيين عادي كده في الشارع و هاديكو مثال بسيط

و علي فكرة الموقف ده حصل فعلا و مش مبالغه

واحده صاحبتي ماشيه في امان الله في الشارع لا بيها و لا عليها مش متوقعه اي شر من الدنيا فجأة تلاقي عمو اللي جنبها موطي دماغه في الارض توقعت طبعا انه بيدور علي حاجه فطبعا الفضول قتلها و قالت تبص هو بيدور علي ايه ؟؟؟ عشان تكتشف الاكتشاف الرهيب.....!! و هو ان عمو كان بيتف..!!!!! و الاكتشاف الافظع ان التفه دي جت فوق جزمتها...!!!! طب بالله عليكم !! اللي جزمته يجي عليها طين ممكن يلمعها لكن اللي يجي عليها حاجه زي كده يعمل ايه ؟؟؟؟

يقطع رجله و معاها الجزمه ؟؟؟

و المواقف اللي زي كده كتيرو مالهاش حصر

طب موقف تاني بس المرة دي مالهوش علاقه بالتف عشان انا عارفه ان في بنات ممكن يقروا الكلام ده و غالبا معدتهم مش هاتستحمل

كانت اختي في العتبه هي و صحابها بيشتروا حاجات للكليه

المهم ماشيين جروب كبير و فظيع اذ فجأة تلاقي حاجه اترمت عليها من فوق؛ طبعا اول رد فعل انك هاتفكر ايه اللي اترمي عليك...؟؟؟ فتكتسشف ان الحاجه اللي اترمت عليك دي بتتحرك...!!! و مش بتتحرك بس لا دي بتجري ...!!! قتهبط عليك الحقيقه ببطء الا و هي ان اللي اترمي عليك

فاااااااااااااااااااااااااااااااااااااااااااااااااااار

لا و ايه فار صاحي

طبعا واحد- من اللي قلبهم حنين - لاقاه في بيته قرر انه يتخلص منه بس يتخلص منه ازاي من غير ما يموته ؟؟ فقال انه يرميه من الشباك و طبعا جه حظ اختي اللطيف انها تكون معديه في لحظه حاسمه زي دي

المواقف كتير و الغريبه ان الناس متعايشه مع حاجه زي كده و ماعندهاش اي مشكله و لا بيظهروا ادني اعتراض

كأن ده الطبيعي ؛ و كأن اللي بيرفض حاجه زي كده هو اللي مش طبيعي

و كأن فرض علي كل واحد انه يمشي يخلي باله من جزمته لحسن اللي جنبه يتف عليها؛ و لازم انه ما يمشيش من تحت بلكونة او شباك لحن يترمي عليه فار، او في احسن الاحوال ميه المسح- ده لو كان محظوظ و مامته بتدعيله ليل و نهار-بقت مسؤليتنا الشخصيه ان احنا نحاول ننقذ نفسنا من المهازل دي

و اوعوا حد يعترض لأن الرد الوحيد هو ان الشعب المصري عمرة ما هينضف

ولا ايه ؟؟؟؟؟؟؟؟

خلف الاسوار

'' و ليعلم الجاني ان الجريمة لا تفيد و ان الطريق الوحيد الذي تؤدي إليه هو خلف الاسوار''

اعتقد ان اغلبنا عارف الجمله دي من برنامج (خلف الاسوار) الشهير اللي ما فيش بيت مصري إلا و اتفرج عليه و لو مرة علي الاقل
الملاحظه الغريبه اللي انا لاحظتها مؤخرا، -و ما اعرفش ان كان حد لاحظها قبل كده ولا لا- هو ان ما فيش حد جه خلف الاسوار الا بتوع الجريمة التي لا تفيد , بمعني اخر عباس اللي قتل ابن اخت جوز خالته عشان يسرق من عنده 400 جنيه, او سمعه اللي شوه باتعه الرقاصة عشان رفضت انها تديله فلوسها .

لكن عمرنا ما شفنا حد من الكبار الجامدين خلف الاسوار, و كأن البرنامج عاوز يقول ان ما بيدخلش خلف الاسوار غير الغلابة اللي ما عرفوش يقوموا بالجريمة اللي تفيد
اللي ما يعرفش يوصل للناس دم ملوث لازم يدخل خلف الاسوار واللي ما يعرفش يسرق 5 او 6 مليون لازم مصيره ينتهي خلف الاسوار
انا مش مع حكشه ولا سمعه و لا عباس لا انا طبعا ضدهم لكن انا بس بستغرب ازاي اللي يسرق 400 جنيه يدخل السجن و تيجي المذيعه الاموره و تقف قدامه و تقوله بص للكاميرا يا دعبس و طبعا دعبس يفضل باصص في الارض و تروح بعد كده قايلاله قولنا انت قد ايه ندمان و اد ايه نفسك تتشنق عقابا ليك علي جريمتك البشعة ,و طبعا انت حاسس ان ده قمه العدل مش كده؟

لكن ممدوح اسماعيل يوم ما اسمه يجي لازم طبعا يجي في برنامج محترم بيقدمه مذيع وسيم و معاه ضيوف لطاف يقعدوا يشخطوا في بعض و ما حدش يوصل لحاجه في الاخر, و طبعا من ضمن الضيوف المحامي الخاص بممدوح اسماعيل لكن السيد المبجل لا يظهر بتاتا في اي من البرامج

اصحاب فضيحه الدم الملوث مازلوا مطلقي السراح و كل واحد منهم بيرمي التهمه علي التاني و كأن ارواح الناس الغلابه ما تستاهلش ان حد فيهم يدخل خلف الاسوار او حتي يتحاسب عشان يطفوا نار الناس الغلابه

الجاني المفروض يبدأ يتعلم من خطأ اللي سبقوه , لازم يبدأ يفكر في الجريمة اللي بتفيد لان السجون مليانه باللي معرفوش يعملوا الجريمة الصح

اللي معرفوش يغرقوا عباره عليها مئات الارواح , اللي ما عرفوش يوزعوا دم ملوت علي المستشفيات

عزيزي الجاني : ابدأ فكر صح, اعمل الجريمة الصح عشان ما تلاقيش مصيرك في النهايه خلفها ( خلف الاسوار)