مش عارفه ليه بحس بشبه غريب بين المطربه الكنديه(علي ما اظن)سيلين ديون والمطربه فيروز
دايما لما بتكلم مع صحابي عن سيلين ديون اقول عليها دي فيروز الغرب
نفس الصوت الهادي الرقيق و الاحساس العالي و القدرة علي خلق حاله خاصه تعيش الواحد فيها
انا هتكلم الاول عن فيروز و ممكن اتكلم عن سيلين مرة تانيه
مش عارفه ليه صوت فيروز مرتبط معايا بالشتا و البرد
يعني لما الجو يكون برد و السما علي وشك انها تمطر
و الدنيا مغيمة اوي
الشوارع شبه فاضيه
الناس الموجوده في الشارع بتجري عشان تلحق تروح بيوتها قبل ما تمطر عليهم
و الشمسيات
و الجواكت التقيله المضمومة اتقاءً للبرد
ساعتها بحس ان فيروز هي ملكه اللحظه
ساعتها صوت فيروز بقدر ياخدك لعالم تاني خالص عالم فيه
طرقات مهجورة
و ورق شجر لونه اصفر واقع علي الارض
وفيه البنات ما بيتقالش عليهم بنات و بيتقال عليهم صبايا
و الحب اسمه هويَ
و الناس ما بتزعلش الناس فيه بتنقهر
عالم زجاجي رائع
حاجه كده كأني مسكت
snow globe
لو حد يعرفها و بصيت فيها شفت كل ده
اللي سمع اغنيه ضحك اللوز او اغنيه رجعت الشتويه هايفهم انا بتكلم عن ايه
ياااااااااااااااة ... ايه العبقريه دي
الوحيده اللي مع صوتها تقدر تسمع صوت افكارك - تسمع افكارك بوضوح- ما فيش موسيقي عاليه تغلوش عليك
او صوت نشاز او ممرقع - سوري علي ممرقع دي بس ده الوصف الوحيد اللي ممكن تتوصف بيه الاصوات دي- يشتت ذهنك
فيروز دي عبارة عن معادله صعبة خلقتها موهبه الهيه مع غبقريه الحان الرحبانيه مع اشعار حساسه و رقيقه جدا
عملت حاله حاله من العذوبه و الرُقي
حاله صعب انها تتكرر تاني
Atom Feed (xml)
17 comments:
فيروز دى حياتى
يا سلام لما بئه لما ترجعى بعد اجهاد وتعب يوم كامل من الشغل وتاخدى حمام دافى وتصفى ذهنك وتطفى النور وتقعدى تسمعى فيروز بس اوعى تسرحى علشان تقدرى تستمتعى
يااااااااااااااااه
دنيا تانية خالص
احساسك رقيق زيك
لان سلنديون وفيرز فعلا مش اى حد يحسهم
تحياتى يا احلى سالى
انا دلوقتى بس اتأكدت اننا قريبين اوى من بعض ..
انا معاكى تماما ان فيروز وسيلين ديون ..تقريبا شخص واحد ..عندهم نفس الاحساس العالى والصوت الشامخ وروعة الاندماج الحسى مع كلمات اغانيهم واللى بتعيشنا فى جو رائع وخصوصا لو اتسمعوا فى احلى فصل فى السنة
....
فصل الشتــــــــــــــاء
....
انا بعترف انى ما كنتش بسمع لفيروز ..وحتى لما كنت بشوفها فى التليفزيون كنت بغير المحطة على طول ...بس ده لانى كنت جاهلة ..وكنت مش عارفة ايه مدى خطورة اللى بعمله ده
...
بس الحمد لله ان عقلى رجعلى وبقيت بسمع لفيروز ..وخصوصا اغنية رجعت الشتوية ...عاملة معايا دماغ بجد ما حصلش يعنى
:D
...
تحياتى ليكى ولزوقك العالى ..
وكفاية كمان ان اسمنا واحد ..
تخيلى اول مرة احس ان اسمى حلو
;)
تحياتى
و يوري ليه ايوه اصوات نشاز و بصراحة يعني فيروز ليكي حق تقولي عليها اكتر من كدا و بردو بجد كنت بشوف فيه وجه شبه بينهم يمكن الشبه في عذوبة الصوت و جمال الشخصية لكن طبعا فيروز يعني اقولك بحب اوي اشوفها في الحفلات بتاعتها و هي واقفة كدا بالشموخ بتاعها بجد ملكة و صوتها يخدك لعالم تاني...فيروز هي للاسف حاجة مش هتكرر تاني لانها حالة فريدة من نوعها...تحياتي ليكي على الموضوع الجميل ده لانها تستهل كمان اكتر من كدا..و يلا سلام
أييييي... جيتي على الجرح جااااامد أوي
لو قلت "بعشق" صوتها و كل أغانيها، حقيقي مش هكون وفيتها حقها. لو قلت انك كتبتي اللي فعلا كنت ناوية اكتبه في البوست اللي بعد الجاي مش هتصدقيني :)
بس دة بجد جدا جدا. كنت هكتب عن سحر فيروز، و اللي بحسه لما اسمعها، و انها بجد تملك القدرة انها تنقلك لعالم تاني خاااالص في لحظات
كنت بجد فعلا هكتب عنها في الوقت دة بالذات لأن نسمات البرد الخفيفة بدأت... و دة "والله" بجد بيفكرني بيها جدا.. و كل ما احس بنسمة برد بتعدي علي بفتكرها
عايزة اقوللك اني ...مممم..صدمت يمكن؟ ، مش عارفة اجيب الكلمة الصح!! يمكن "اذبهليت" :) من أول ما قرأت عنوان البوست دة!! ربنا يفرحك يا سالي.... و حقيقي جيتي على الجرح جامد اوي :)
بوست موفق اوي بجد. سعيدة جدا اني جيت البلوج دة النهاردة
اولا انا مش من عشاق الموسيقى الانبه عموما علشان احكم على سلين ديون بس كانت بدايه معرفتى بيها ونهايه المعرفه الاغنيه الرائعه الخاصه بفيلم تايتنك
انا على فيروز انا بوافقك على كلمه قلتيها عليها لانى اعتقد انى فيروز حاله منا الحالات التى لن تتكرر فى تاريخ الغناء العربى
مش قادر ااقولك انك لما وصفتى حال الشتال والبرد والناس وهى ماشية لاخر كل الصفات دى ...انتى وصفتى اللى بيحصل فعلا لما الواحد بيسمع الصوت العذب فيروووووز
احييكى..:)
على فكرة عندي بوست ليكي عن فيروز :)
سالي
***
تسمحيلي اعلق..؟!
اوك يا فندم!
انا بقا كان ورا المدرسة الثانوية بتعتي في عابدين واحد بتاع حاووشي انما جنان...شطة ايه..وخلطه ايه..ومخلل ايه..المهم الراجل ده كان مغرم فعلاً بفيروز..وانا كنت دايماً اسمع عنده شرايط ليها..هو كان في الأربعينات وكان شكله مثقف..بس انا لما غادرت المدرسة الي الجامعة إرتبط عندي صوت فيروز بالحوواشي بالمدرسة واوهام المراهقة إرتباط شرطي يعني...و...
كل ما اسمعها بتقول: حبيتك في الصيف
أردد تلقائياً:وحوواشي في الشتا..!!
(:
اشاركك الاعجاب بفيروز
انا برضه بحب فيروز وبحب اسمعها اكتر فى الخريف اصله اكتر فصل بحبه عموما فيروز هي اللى بسمعها دايما لما اكون عايز اعمل سلام نفسي مع روحي
تحياتى كتير
تشي
صوت فيروزى رائع
وصف جميل
مشاعر رقيقة
كل اغانيها داخل فيها شتا و مطرة
عبارة تشتى الدنى مذكورة فى عدد كبيرررر جدا من اغانيها
انا برضه كنت بسمعها كتير زمان و حاليا لما افتكر اسمع اغانى بسمعها هه
:)
عندك حق والله إنك ربطي بين سلنديون وبين فيروز
مع إني بحب الاتنين موووت بس أول مرة أفكر أقارن بينهم فعلا الاحساس شبه واحد لما بسمع الاتنين
صوت بياخد الواحد من العالم المزعج اللي احنا فيه ده
تحياتي ليكي وماتغيبيش عننا كتير
كان معكم ..,
كيوووووووووو
فيروووووووووز
الله على صوتها
وعلى حنان نبرته
وعلى رقة الكلمات
وهى خارجه منها
هنقول ايه ولا ايه ولا ايه
الله عليكي يا فيروز
اه على فكره سيلين ديون
فرنسيه مش كنديه
ايه يا بنتى انتى فين ؟
انا غبت اسبوع واحد وانتى كنتى غايبة من قبل الاسبوع ده اسبوع كمان
...
؟؟؟؟؟
دى مشكلة نت تانى ولا ايه
؟؟؟؟
ابقى طمنينا عليكى بس
..
يا رب خير ان شاء الله
اه صحيح انا جيت اقولك ان سيلين ديون فرنسية الجنسية تقريبا
تشي
فيروز (او نهاد حداد) حالة فعلا صعب تتكرر تاني ...
بجد مالهاش حل ؟؟
طب وبالنسبة لسيلين ؟؟ هتبقى البوست الجاي ان شاء الله .. مش كدة ؟؟
والسـ ختام ــلام
انا مش معاكى
ابدا
ف ان فيروز وسيلين ديون قريبين من بعض
انا هقولك حاجة واحدة عن فيروز
_الصوت الملائكى _
ملحوظة
انا بعشق الاتنين
Post a Comment